Frá Tungubökkum.
Afturelding hefur náð samkomulagi við Liverpool um að enska knattspyrnufélagið verði með knattspyrnuskóla á Tungubökkum í Mosfellsbæ 7.-9.júní næstkomandi.
Samningur félaganna er til fimm ára og því verður knattspyrnuskóli Liverpool í Mosfellsbæ næstu árin.
Liverpool starfrækir knattspyrnuskóla víða um heim og leggur mikla áherslu á þjálfun barna og unglinga, en barna- og unglingastarf Liverpool hefur alið af sér heimsklassa knattspyrnumenn eins og Steven Gerrard.
Liverpool sendir sjö af þjálfurum sínum til Íslands og lögð er höfuðáhersla á að allir þátttakendur á námskeiðinu verði undir stjórn þjálfara frá Liverpool. Hver þjálfari Liverpool mun stýra hópi með 16 börnum og til aðstoðar verða þjálfarar Aftureldingar, sem munu m.a. sjá um að túlka á íslensku. Sérstakur æfingahópur verður fyrir markmenn.
Námskeiðið í sumar er fyrir stráka og stelpur á aldrinum 6-12 ára (5.-7. flokkur). Á þremur sólarhringum seldist upp á námskeiðið en unnið er að því að fá fleiri þjálfara frá Liverpool, svo enn er tekið við skráningum á biðlista.
Verð á hvern þátttakanda er 15.000 krónur. Námskeiðið stendur yfir frá kl 10 - 15 alla dagana og innifalið er morgunhressing og hádegisverður.
Hægt er að skrá sig á biðlista með með því að senda tölvupóst á [email protected].
