Heimild: STV
Eggert Gunnþór Jónsson, leikmaður Hearts, er á leið til Wolves í ensku úrvalsdeildinni.
Samkvæmt frétt á vef STV hefur Hearts samþykkt tilboð frá Wolves í leikmanninn.
Eggert var síðan sjálfur í viðræðum við Wolves í dag og allt bendir til þess að hann gangi til liðs við Úlfana þegar félagaskiptaglugginn opnar í janúar.
Eggert, sem er 23 ára gamall, ólst upp hjá Fjarðabyggð áður en hann gekk til liðs við Hearts árið 2005.
Síðan þá hefur Eggert skorað níu mörk í 153 deildarleikjum með Hearts en hann hefur leikið allar stöður í vörninni hjá liðinu sem og á miðjunni.
Hearts á í miklum fjárhagsvandræðum og félagið mun njóta góðs af því að fá pening í kassann fyrir Eggert.
