„Það hefur ekkert breyst. Bjarni er enn aðalmarkvörður," segir Kristján Finnbogason sem kom óvænt í markið hjá Fylki á Reykjavíkurmótinu í gær. Hann kom inn sem varamaður í jafnteflisleik gegn Þrótti.
Kristján verður 41 árs á árinu en hann er þekktastur sem markvörður KR um margra ára skeið. Síðustu ár hefur hann spilað í markinu hjá Gróttu.
Kristján verður 41 árs á árinu en hann er þekktastur sem markvörður KR um margra ára skeið. Síðustu ár hefur hann spilað í markinu hjá Gróttu.
Eftir síðasta sumar lagði hann hanskana til hliðar og er nú markmannsþjálfari hjá Fylki.
Hanskarnir verða þó til taks ef á þarf að halda.
„Ég er fyrst og fremst markmannsþjálfari. Ég hef þó verið í marki á æfingum þegar þess hefur þurft og mun halda því áfram. Það var fínt að spila þennan leik í gær, maður sér hlutina öðruvísi þegar maður er inná vellinum."
Bjarni Þórður Halldórsson er aðalmarkvörður Fylkismanna.
„Svo höfum við tvo unga markverði sem eru í öðrum flokki. Ég vona að Bjarni haldist bara heill," segir Kristján en honum lýst vel á Fylkisliðið.
„Mér lýst ljómandi vel á allt hérna. Við höfum samt ekki náð að spila á okkar sterkasta liði þar sem lykilmenn hafa verið meiddir."
Fylkismenn unnu B-riðil Reykjavíkurmótsins en leikið verður í undanúrslitum á fimmtudeginum í næstu viku.
