Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
banner
   mán 13. febrúar 2012 12:00
Hafliði Breiðfjörð
Norðurlandsmótið um helgina: Sigrar hjá KF og Þór 2
Valdimar Pálsson skrifar frá Akureyri
Agnar Þór Sveinsson skoraði fyrir KF.
Agnar Þór Sveinsson skoraði fyrir KF.
Mynd: Fótbolti.net - Magnús Már Einarsson
Mynd: Fótbolti.net - Andri Fannar
Tveir leikir fóru fram í Hleðslumótinu á Akureyri um helgina. Hér að neðan er umfjöllun um þá.

Völsungur 0-1 KF
0-1 Agnar Þór Sveinsson (´16)

Leikurinn byrjaði rólega en fyrsta alvöru færið fékk Völsungurinn Ásgeir Sigurgeirsson á 10. mínútu en hann skallaði yfir úr upplögðu færi. KF náði betri tökum í leiknum og spiluðu vel sín á milli. Þeir uppskáru eina mark leiksins á 16. mín en þá áttu þeir gott einnar snertingar spil inní teig sem endaði með góðu skoti Agnars Þórs í fjærhornið. Á 30. mínútu var Agnar Þór aftur aðgangsharður við mark Völsunga en þá náði hann að skjóta yfir Ingólf Örn í marki Völsungs en varnarmenn náðu að bjarga í horn. Hornið var gott og náði Milos góðum skalla að marki sem var varinn og Sigurbjörn Hafþórsson átti skot sem var varið. Á 36. mínútu fengu Völsungar aukaspyrnu rétt fyrir utan teig, Arnþór Hermannsson átti gott skot að marki en Halldór Guðmundsson í marki KF varði vel. Á lokamínútu uppbótartíma fékk Agnar Þór upplagt færi en í stað þess að skjóta þá reyndi hann sendingu en Völsungar komust inní og björguðu í horn.

Völsungar byrjuðu seinni hálfleik af miklum krafti og strax á fyrstu mínútu átti Sindri Ingólfsson gott skot sem fór naumlega framhjá. Á 51. mínútu náði Hafþór Mar Aðalgeirsson að renna sér í gegnum vörn KF en ágætt skot hans var vel varið af Halldóri í markinu. Á 55. mínútu fækkaði í liði KF en Kristján Vilhjálmsson fékk þá gult spjald fyrir brot en það var seinna gula spjaldið sem hann fékk í leiknum. Á 60. mínútu átti Arnþór gott skot að marki KF en Halldór náði að verja í þverslá og út í teig. Á 67. mín átti títtnefndur Arnþór góða sendingu úr aukaspyrnu inná teig en varnarmenn KF náðu að bjarga í horn á seinustu stundu.

Á 69. mínútu komst Arnór Hallsson upp kantinn og átti góða sendingu fyrir markið en Ingólfur Örn var vel vakandi í markinu og bjargaði með góðu úthlaupi. Völsungar fengu svo tvö ágæt færi, fyrst á 73. mínútu en þá átti Arnþór gott skot en framhjá og á 75. mínútu komst Sindri einn gegn Halldóri í markinu en skotið var fast og vel yfir. Á 88. mínútu náðu Völsungar að skora en það mark var réttilega dæmt af vegna rangstöðu. Lokafæri leiksins fékk KF, en þá náði Gabríel Reynisson skoti framhjá Ingólfi markmanni Völsungs en Bjarki Þór Jónasson rétt náði að hlaupa eftir boltanum og bjarga á línu.

KF náði því að lenda í 5. sæti Hleðslumótsins, en Völsungar höfnuðu í því 6.

Maður leiksins Halldór I. Guðmundsson (KF)

KA2 0-2 Þór2
0-1 Ingólfur Árnason (´33) víti
0-2 Bergvin Jóhannsson (´43)

Leikurinn byrjaði af miklum krafti og ekkert var gefið eftir. Ljóst var að leikmenn beggja liða ætluðu að berjast eins og ljón í leiknum. Þórsarar byrjuðu betur og fengu upplagt færi á 7. mínútu þegar Baldvin Þór Rúnarsson bakvörður Þórsara átti gott upphlaup, komst inní teig og átti gott skot á fjærstöng sem stefndi í netið en sóknarmaður Þórs sem var rangstæður náði að pota boltanum yfir línuna.

Á 20. mínútu fengu Þórsarar aukaspyrnu rétt utan teigs en skotið var vel varið af Agli Sigfússyni í marki KA. Á 31. mínútu átti Kristján Freyr Óðinsson gott skot að marki Þórsara sem Ari Már Egilsson varði vel. Stuttu síðar átti Þórarinn Stefánsson gott skot sem Ari varði glæsilega. Á 33. mínútu fengu Þórsarar vítaspyrnu eftir að Egill markvörður KA manna felldi Þórsara innan teigs.

Ingólfur Árnason tók spyrnuna og skoraði með skoti út við stöng en litlu mátti muna að Egill næði að verja skotið. Á 37. mínútu tók Aksjentije Milisic aukaspyrnu og sendi hættulegan bolta inná teiginn en Þórsarar náðu að bjarga á seinustu stundu. Þórsarar skoruðu svo á markamínútunni en þá átti Ingólfur góða sendingu inná Bergvin sem náði góðu skoti í fjærhornið.

Staðan í leikhléi 0-2.

Seinni hálfleikur hófst með mikilli baráttu beggja liða og óskynsamlegum brotum. Á 58. mínútu komust fjórir KA menn í gegnum vörnina hjá Þór og Ævar Jóhannesson fékk upplagt færi en hitti boltann illa og skaut framhjá.

Á 60. mínútu misstu Þórsarar leikmann af velli þegar Rúnar Freyr Þórhallsson fékk seinna gula spjaldið og þar með rautt. Á 83. mínútu sendi Ævar góða sendingu inná Jóhann Örn Sigurjónsson sem skaut yfir úr upplögðu færi. Á 83. mínútu fékk Freyr Baldursson, leikmaður KA, beint rautt fyrir seina tæklingu. Á 88. mínútu komust Þórsarar í ágæta sókn sem endaði með góðu skoti Sigmars Bjarna Sigurðssonar sem Egill markvörður KA manna varði útvið stöng. Lítið gerðist eftir þetta og leiktíminn fjaraði út. Þór2 endaði því í 7. Sætinu og KA2 í því áttunda.

Maður leiksins var Ingólfur Árnason (Þór).
Athugasemdir
banner
banner