Hugi Halldórsson tekur við þjálfun Stjörnunnar. Hér stýrir hann liðinu af hliðarlínunni í leik gegn Fylki á dögunum en Jóhannes Karl hafði fengið brottvísun.
Stjörnumenn sendu nú rétt fyrir hádegið frá sér fréttatilkynningu þar sem greint var frá því að Jóhannes Karl Sigursteinsson þjálfari liðsins væri hættur með liðið í kjölfar taps gegn Fjölni í VISA bikarnum í gærkvöld og Hugi Halldórsson tekur við starfi hans.
Hugi sem er betur þekktur sem sjónvarpsmaður í Strákunum og 70 mínútum hefur verið aðstoðarþjálfari liðsins og verður nú aðalþjálfari.
,,Gengi Stjörnunnar í sumar hefur verið undir þeim væntingum sem gerðar voru til liðisins og forystumenn Stjörnunnar hafa því ákveðið að nú þegar nokkurt hlé verður á keppni í Landsbankadeild kvenna sem nú er u.þ.b. hálfnuð, sé rétti tíminn til að leita nýrra leiða við undirbúning liðsins fyrir átökin í seinni umferð Íslandsmótsins," sagði í yfirlýsingu Stjörnunnar og Jóhannesi var svo þakkað samstafið og óskað velfarnaðar á nýjum vettvangi.
Stjarnan er í sjötta sæti Landsbankadeildar kvenna með 9 stig. Hafa unnið tvo leiki, gert þrjú jafntefli og tapað tveimur.
Athugasemdir
