Þjálfari liðsins er Haraldur Sigfús Magnússon sem upphaflega hafði verið ráðinn til ÍA í haust til að þjálfa 5. flokk karla og 6. flokk kvenna. Haraldur hefur reynslu af þjálfun meistaraflokksliðs kvenna því hann þjálfaði lið GRV, sem er sameinað lið Grindavíkur, Reynis og Víðis, á síðasta ári.

Haraldur sagði í samtali við Fótbolta.net að hann hafi byrjað að fylgjast með Old girls liði Skagans þar sem margir fyrrverandi leikmenn ÍA hittust vikulega og spiluðu saman. Hann hafði verið fenginn til að þjálfa 2. flokk tímabundið þar til Magnea Guðlaugsdóttir kæmi til landsins til að stýra liðinu um áramótin. Útfrá því kom sú hugmynd að stofna meistaraflokks lið sem tæki þátt í Íslandsmóti.

,,Ég skoðaði bara efnisviðinn sem var hér og sá að það voru margar hæfileikaríkar stelpur hér. Það var enginn agi og lítill metnaður og þær tóku næstum allt fram yfir fótboltann," sagði Haraldur.

,,Ég nenni ekki að hanga í einhverri meðalmennsku og fór á fullt í að reyna að koma mínum sjónarmiðum á framfæri. Ég fékk þá nokkrar af eldri leikmönnum til að koma á æfingar hjá mér til að auka tempóið á æfingum og koma inn með annað hugafar. Stelpurnar tóku svo sannarlega við sér og þessar eldri fóru að mæta fleiri."

,,Ég fór þá með hugmynd til stjórnarinnar að stofna meistaraflokk sem var allt annað en tekið vel í og fólk var bara hissa á að mér skildi detta þetta í hug. En ég gaf mig ekki og safnaði saman stelpum og gerði góða áætlum um það hvernig ég ætlaði að framkvæma þetta og lagði það aftur fyrir stjórnina. Stjórnin tók vel í þetta og við fórum í undirbúningsvinnu og eftir langa og stranga undirbúnings vinnu var sú ákvörðun tekin að fara af stað með 2.- og meistaraflokk kvenna á Akranesi. "

Eftir komu Magneu til landsins ákvað hún að einbeita sér frekar að yngri flokka þjálfun og því var Haraldur ráðinn þjálfari meistara- og 2. flokks kvenna. 2. flokkurinn mun í sumar verða í samstarfi við Aftureldingu úr Mosfellsbæ en félögin senda sameiginlegt lið til keppni í 2. flokki kvenna.

,,Við erum með svona í kringum 30 stelpur í 2.- og meistaraflokki og við verðum í samstarfi með Aftureldingu í 2.flokki. Við erum með 26-28 stelpur á samning," sagði Haraldur um leikmannahópinn.

,,Kjarninn í hópnum eru stelpur fæddar ’91 og þar af leiðandi erum við með mjög ungt lið. En með því að hafa fengið eldri stelpur inn aftur þá er þetta góð blanda af ungum og reyndum leikmönnum."

En það eru líka eldri stúlkur sem koma til liðs við hópinn að þessu sinni auk þess liðið hefur verið styrkt ennfrekar. ,,Það eru 7-8 stelpur sem hafa lítið sem ekkert spilað síðan árið 2004 og er einna helst að nefna Ragnheiði Rún fyrirliða og Ingunni Dögg sem báðar tvær gætu spilað með hvaða liði sem er í Úrvalsdeildinni að mínu mati," sagði Haraldur. ,,Við erum bara búnar að fá markmann GRV hana Margréti Ingþórsdóttur sem er ein af efnilegustu markmönnum landsins. Svo komum við til með að bæta við okkur 2-3 leikmönnum í viðbót."

Allt eins og í karlaboltanum er unglingastarf sterkt í kvennaboltanum hjá ÍA þar sem sterkir leikmenn hafa komið upp undanfarin ár. Við spurðum Harald hvort ekki hafi verið reynt að fá einhverjar af þeim stúlkum til að snúa aftur á heimaslóðir.

,,Já við erum búin að reyna það, við fengum Karítas Elvarsdóttir tilbaka frá Stjörnunni. Og við höfum reynt að fá gamlar skagastelpur heim en þær eru ekki tilbúnar að taka það skref strax. En vonandi fáum við þær yfir sem fyrst því ef við værum með okkar heimastelpur allar hér þá værum við með mjög sterkt lið í úrvalsdeild ( Elín Anna Breiðablik, Hallbera, Helga Sjöfn, Bára, Aníta Lísa úr Val. Thelma Ýr í Fylkir) fyrir utan þær sem eru nú í ÍA."

ÍA leikur í 1. deild kvenna í sumar sem jafnframt því að vera næst efsta deild er sú neðsta í kvennaboltanum. Keppninni er skipt í tvo riðla þar sem efstu lið hvors riðils keppa um sæti í Landsbankadeild kvenna á næstu leiktíð. En hvaða markmið setur ÍA sér fyrir sumarið?

,,Markmið okkar er bara að standa okkur vel og sýna það og sanna að við eigum fullt erindi í þessa deild. Við ætlum okkur að berjast við liðin í efri hlutanum en gefum okkur 2-3 ár til að komast upp. Það bíður frábær ’93 árgangur eftir að fá að taka við eftir nokkur ár og þá getum við sett stefnuna á titla. Ég segi að dollan stóra komi hingað á skagann eftir svona 5-6 ár."

Haraldur stendur ekki einn að liðinu því auk þess sem hann hefur gert tveggja ára samning um þjálfun liðsins hefur hann fengið sér til aðstoðar þau Lúðvík Gunnarsson og Steindóru Steinsdóttur og þá mun Þórður Þórðarson sjá um markmannsþjálfunina.

,,Hér er allt til fyrirmyndar, við erum með frábæra æfingaaðstöðu, gott þjálfaralið og stóra og mikla hefð. Elísabet Gunnarsdóttir þjálfari Vals sagði að litlu liðin ættu frekar að færa sig á hærri standard til að halda stelpum hjá sér í stað þess að væla yfir því að stóru liðin steli öllum góðu stelpunum," sagði Haraldur.

,, Það er það sem við erum að gera hér og ÍA er verðandi stórveldi í kvenna knattspyrna og ég fullyrði það að Valur, Breiðablik og KR eru einu liðin sem gætu verið með betri aðstöðu og umgjörð í kringum meistaraflokk kvenna á Íslandi í dag."

Lið ÍA hefur spilað nokkra æfingaleiki eftir áramót og á sama tíma og 2. flokkurinn hefur átt erfitt uppdráttar hefur gengið verið gott í meistaraflokknum. Liðið hefur nú spilað þrjá leiki þar sem þær unnu lið Þróttar 4-3, tapaði fyrir Landsbankadeildarliði Stjörnunnar 2-0 og gerði jafntefli við Hauka. Um páskana heldur liðið svo til Albir þar sem lokaundirbúningur fer fram fyrir Íslandsmótið.

Liðið heldur úti vel uppfærðri vefsíðu þar sem lesa má um leiki liðsins, sjá yfirlit yfir alla leikmenn og margt fleira. Vefsíðan er á slóðinni www.skagastelpur.bloggar.is .