Heimild: The Guardian
Sebastian Coe, formaður skipulagsnefndar Ólympíuleikanna í London 2012, vill fá Sir Alex Ferguson til þess að stjórna breska landsliðinu sem myndi taka þátt í Ólympíuleikunum það ár.
Coe staðfesti í samtali við enska dagblaðið, The Guardian, að óformlegar viðræður við Ferguson hafi farið fram en vildi ekki fara nánar út í þær að svo stöddu enda er þetta einungis hugmynd á þessu stigi.
,,Það yrði frábært ef Alex þjálfaði liðið og ég get ekki hugsað mér neinn annan sem ætti það meira skilið,” sagði Coe.
Breskt landslið sem samanstendur af leikmönnum frá Englandi, Skotlandi og Wales tók síðast þátt í Ólympíuleikunum árið 1972 og var þá einungis skipað áhugamönnum.
Ekki er mikill áhugi fyrir þessari hugmynd í Skotlandi og Wales og hafa forvígismenn skoska knattspyrnusambandins t.a.m. hótað að banna leikmönnum innan vébanda þess að spila undir merkjum Bretlands komi til þess að þeir yrðu valdir.
