Heimild: Heimasíða Barcelona
Eiður Smári Guðjohnsen gat tekið þátt í venjulegri æfingu hjá Barcelona bæði í dag og í gær en liðið undirbýr sig nú fyrir síðasta deildarleik tímabilsins gegn Real Murcia.
Allt lítur út fyrir að Eiður sé búinn að jafna sig á meiðslunum sem urðu þess valdandi að hann þurfti að fara af leikvelli í leiknum gegn Real Madrid fyrir rúmri viku síðan.
Barcelona þarf nauðsynlega á sigri að halda gegn Murcia ætli þeir sér að halda þriðja sætinu í deildinni en Atletico Madrid sækir hart á þá.
Töluvert er um meiðsli hjá Börsungum, Edmílson, Deco, Márquez og Zambrotta eru allir mjög tæpir fyrir leikinn á laugardagskvöldið.
Yaya Toure verður einnig frá í 6 til 8 vikur vegna meiðsla, auk þess sem það er ljóst að Gabriel Milito verður frá í allt að 6 mánuði eftir að hann sleit krossband gegn Manchester United.
Eiður ætti því að eiga ágætis möguleika á að fá tækifæri gegn Murcia um helgina miðað við þennan langa meiðslalista.
