Heimild: Reuters
Michael Laudrup mun hætta sem þjálfari Getafe í lok tímabilsins en hann greindi frá þessari ákvörðun sinni á fréttamannafundi í dag.
,,Tími minn hjá félaginu er kominn á enda," sagði Laudrup á fréttamannafundi í dag en hann kom liðinu í 8-liða úrslit Evrópukeppni Félagsliða og úrslitaleik spænska bikarsins í ár. Þá er liðið með öruggt sæti í úrvalsdeildinni þegar ein umferð er eftir.
,,Ég kem með þessa yfirlýsingu svo að félagið eigi möguleika á að finna eftirmann og þá vil ég þakka þeim fyrir að hafa gefið mér þetta tækifæri."
Laudrup tók við Getafe af Bernd Scuhster síðastliðið sumar en þessi knái Dani lék á sínum tíma með Barcelona og Real Madrid á Spáni.
Undanfarið hefur hann verið orðaður við þjálfarastöðu hjá nokkrum liðum og meðal annars hafa verið sögusagnir um að Chelsea vilji fá hann til starfa.
