Heimild: AFP
Lahm í leik með þýska landsliðinu.
Þýski varnarmaðurinn Philipp Lahm sem leikur með Bayern Munchen sagði í gær að eftir samtal við nýja þjálfarann, Jurgen Klinsmann, hafi hann tekið ákvörðun um að yfirgefa félagið ekki í lok tímabilsins og því hafi hann framlengt samningi sínum við félagið til 2012.
Lahm sem er 24 ára gamall var í gær valinn í þýska landsliðshópinn sem fer á Evrópumót landsliða í næsta mánuði og Klinsmann sem er fyrrverandi landsliðsþjálfari er að taka við Bayern Munchen af Ottmar Hitzfeld 1. júlí næstkomandi.
Upp úr samningaviðræðum milli Lahm og Bayern hafði slitnað í apríl og því voru vangaveltur um að hann væri á förum til Barcelona. Hann hefur nú gert fjögurra ára samning við Bayern.
,,Ég er mjög ángægður, ég hef átt mjög gott samtal við framtíðar þjálfarann Jurgen Klinsmann," sagði Lahm sem á að baki 39 landsleiki og hefur skorað í þeim tvö mörk.
,,Ég hef það á tilfinningunni að spennandi hlutir séu framundan og það taldi mig á að fara ekki. Eftir að við unnum þýska bikarinnn og deildina er nú nauðsynlegt að taka mikilvægt skref í Evrópu."
Lahm vann sér sæti í byrjunarliðinu árið 2005. Hann á að baki 128 deildarleiki með Bayern.
Athugasemdir
