,,Ég missti af síðustu leikjum Íslandsmótsins vegna meiðsla og því tel ég ekki rétt að gefa kost á mér núna í landsliðshópinn," sagði Höskuldur í samtali við Fótbolta.net í dag en ummælin vekja nokkra athygli enda ekkert sem benti til þess að hann yrði kallaður til eða að breyting yrði á landsliðshópnum sem þegar er búið að tilkynna.

Höskuldur hefur aldrei leikið með A-landsliðinu en hann lék sjö leiki í hægri bakvarðarstöðunni hjá Íslandsmeisturum FH í Landsbankadeildinni í sumar en missti af síðustu vikunum vegna meiðsla.

Íslenska landsliðið mætir því hollenska í undankeppni HM 2010 á morgun en leikið er í Rotterdam. Engin alvarleg meiðsli hrjá leikmenn íslenska liðsins sem hefur æft síðustu daga í Hollandi svo allir geta gefið kost á sér.

Á miðvikudaginn í næstu viku mætir Ísland svo liðið Makedóníu en þá er leikið á Laugardalsvelli.