Guðlaugur Victor ásamt Steven Gerrard fyrirliða Liverpool. Þeir verða liðsfélagar á næstu dögum.
Liverpool gekk nú í dag frá samkomulagi við danska félagið AGF um kaup á Guðlaugi Victori Pálssyni. Þetta staðfesti Guðlaugur Tómasson umboðsmaður leikmannsins í samtali við Fótbolta.net í dag.
Hann sagði að nú séu aðeins formsatriði eftir áður en gengið verður endanlega frá félagaskiptum Guðlaugs.
Hann hefur þegar gert ákveðið samkomulag við Liverpool sjálfur um samning og heldur utan til England á næstu dögum til að gangast undir læknisskoðun hjá Liverpool.
Guðlaugur sagði að ef ekkert óvænt gerðist muni Guðlaugur Victor vera orðinn leikmaður Liverpool strax í janúar og þar mun hann æfa með aðalliði félagsins.
Liverpool og AGF hafa verið í viðræðum um kaupin í langan tíma en náðu loks saman um kaupverð í dag.
Guðlaugur Victor Pálsson er 17 ára gamall og lék í yngri flokkum með Fylki og Fjölni. Hann fékk tækifæri með aðalliði Fylkis á undirbúningstímabilinu vorið 2007 en um það sumar gekk hann í raðir AGF. Hann á að baki 10 leiki með U17, og U18 ára landsliðum Íslands.
Athugasemdir
