Valur mætir FH á Hlíðarenda annað kvöld en ekkert hefur verið gefið út um hver stýrir liðinu í þeim leik þó að líklegt sé að aðstoðarþjálfarinn Þorgrímur Þráinsson verði við stjórnvölinn. Þorgrímur hefur stýrt Val í síðustu leikjum á meðan Willum hefur verið á þjálfaranámskeiði erlendis. Willum kom hingað til lands að nýju á mánudag en hafði ekki stýrt liðinu á æfingu þegar yfirlýsingin kom frá honum og Val í dag.

Willum Þór tók við þjálfun Vals haustið 2004 eftir að hafa áður þjálfað KR-inga. Árið 2006 gerði Willum lið Vals að bikarmeisturum og 2007 stýrði hann liðinu til sigurs í Landsbankadeildinni. Hann skrifaði undir samning út árið 2012 við Val 18. september síðastliðinn.

Willum Þór Þórsson þjálfari Íslandsmeistara Vals hefur svo sannarlega átt farsælan feril og titlarnir hafa komið í hús hverjir á fætur öðrum. Á aðeins fjórum árum náði Willum að vinna alla þá titla sem í boði eru í íslenskri knattspyrnu fyrir meistaraflokksþjálfara í efstu deild.

Árið 2004 gerði Willum, KR-inga að Reykjavíkurmeisturum eftir sigur á Fylki í úrslitaleik 4-3. Árið 2005 var Willum kominn til liðs við Valsmenn og gerði þá að Bikarmeisturum eftir sigur á Fram í úrslitaleik 1-0, það var Baldur Ingimar Aðalsteinsson sem skoraði sigurmarkið.

Í maí mánuði árið 2006 höfðu Valsmenn sigur á FH undir stjórn Willums í úrslitaleik Meistarakeppni KSÍ og árið 2007 tókst Willum að landa sjálfum Íslandsmeistatitlinum með Valsmönnum eftir æsispennandi lokasprett við FH-inga. Að sjálfsögðu var Willum kjörinn þjálfari ársins á árlegu lokahófi KSÍ þetta sama ár.

Valur varð Íslandsmeistari innanhúss í mars 2008 undir hans stjórn þegar þeir sigruðu lið Víðis í Garði. Áfram héldu Valsmenn á sigurbraut og unnu Atlantic Cup þegar þeir sigruðu færeysku meistarana í NSÍ.

Á Verkalýðsdeginum 1. maí 2008 stýrði Willum Þór síðan Valsmönnum til sigurs í Lengjubikarnum það ár. Áður hafði hann unnið allar deildir með Haukum og Þrótti.