Heimild: BBC
Lyon hefur samþykkt tilboð Real Madrid í framherjann Karim Benzema en franska félagið staðfesti þetta síðdegis í dag.
Ýmsar fréttir hafa verið varðandi framtíð Benzema í dag en nú hefur Lyon staðfest að samkomulag hefur náðst við Real Madrid.
Talið er að tilboð Real Madrid hljóði upp á 30 milljónir punda en það gæti hækkað upp í 35 milljónir punda síðar meir.
Benzema hefur einnig verið orðaður við Manchester United og Arsenal í sumar en nú er útlit fyrir að hann gangi til liðs við Real Madrid.
Þar með verður hann fjórði leikmaðurinn sem kemur til félagsins í sumar en Cristiano Ronaldo og Kaka komu á samanlagt 148 milljónir punda auk þess sem varnarmaðurinn Raul Albiol gekk til liðs við Madridinga á dögunum.
Benzema, sem er 21 árs, hefur leikið með aðalliði Lyon frá árinu 2004 en hann hefur skorað 66 mörk í 149 leikjum með liðinu.
