,,Ég held að þetta sé erfið ákvörðun fyrir alla knattspyrnumenn, en engu að síður óumflýjanleg. Það þurfa allir að hætta á einhverjum tímapunkti og í mínu tilfelli er þetta frekar snemmt þar sem ég er 28 ára," sagði Marel við Fótbolta.net.

Marel gekk til liðs við Val síðastliðið vor og hann fékk nýtt samningstilboð frá félaginu. Eins og höfðu mörg félög úr Pepsi-deildinni samband, þar á meðal Stjarnan en Marel varð að neita þeim.

,,Það voru 5 úrvalsdeildarfélög sem höfðu samband, en það var erfiðast að segja nei við Val og Stjörnuna."

,,Valur er flottur klúbbur og það eru spennandi tímar framundan þar á bæ, þeir eru komnir með ferskan þjálfara og allar aðstæður til að rífa sig upp eftir vonbrigða tímabil í sumar."

,,Ég kunni vel við mig í Val, byrjaði mjög vel og skoraði 3 mörk í fyrstu 5 leikjum mínum fyrir félagið og var valinn í úrvalslið fyrstu umferða hjá ykkur á Fótbolti.net en svo var skipt um þjálfara og hafði hann aðrar hugmyndir varðandi hlutverk mitt í liðinu og því miður var það hvorki mér né Val til góðs. En ég vill nota tækifærið og þakka Valsmönnum fyrir samstarfið."

,,Svo var það Stjarnan en ég hef verið að þjálfa sameiginlegt lið Álftanes og Stjörnunar í 2.flokki og þekki því vel til hjá þeim og þeir eru með skemmtilegt lið með mörgum ungum og efnilegum leikmönnum."

Marel var í atvinnumennsku frá 2000-2006 þegar að hann lék með Stabæk og Lokeren.

Eftir stutt stopp hjá Breiðablik fór hann aftur til Noregs þar sem hann lék með Molde í tvö ár. Marel segist vera ánægður með ferilinn hjá sér.

,,Það er margt eftirminnilegt, 7 ár í atvinnumennsku, spilað á móti og með mörgum frábærum leikmönnum, kynnst mikið af góðu fólki og að hafa spilað fyrir landsliðiðið er mikill heiður þannig að ég geng sáttur frá borði. Ég tel mið hafa spilað vel úr þeim kortum sem mér voru gefin," sagði Marel að lokum við Fótbolta.net.