Framherjinn Gunnar Heiðar Þorvaldsson skoraði bæði mörk Reading þegar varalið félagsins sigraði Bristol Rovers 2-1 í æfingaleik í dag.
Gunnar Heiðar, sem er samningsbundinn danska úrvalsdeildarliðinu Esbjerg, hefur verið á reynslu hjá Reading síðan á mánudag í síðustu viku og mun það væntanlega ráðast í kjölfar leiksins í dag hvort hann gangi til liðs við Reading á láni.
Fyrra mark Gunnars kom á fimmtu mínútu þegar hann skoraði með góðu skoti af stuttu færi og það síðara kom þremur mínútum síðar með þrumskoti fyrir utan teig.
Hann var mjög ógnandi í framlínunni og var nálægt því að bæta við sínu þriðja marki undir lok fyrri hálfleiks en skot hans var bjargað á línu af varnarmanni Bristol Rovers.
Brynjar Björn Gunnarsson lék einnig með varaliði Reading í dag.
Athugasemdir
