Kristján Gauti Emilsson, 16 ára miðjumaður úr FH, mun síðar í mánuðinum ganga til liðs við enska félagið Liverpool en þetta staðfesti hann við Fótbolta.net í kvöld.
Kristján Gauti mun fara til Liverpool í næstu viku þar sem að gengið verður frá samningum. Hann mun líklega æfa með U18 ára liði félagsins til að byrja með.
Í síðasta mánuði var Kristján Gauti til reynslu hjá Liverpool þar sem að forráðamenn félagsins hrifust af honum.
,,Það gekk vel á æfingum og þeir voru ánægðir með mig," sagði Kristján Gauti við Fótbolta.net í kvöld.
Kristján Gauti hefur alla tíð verið stuðningsmaður Liverpool og hann segir því að draumur sé að rætast með því að ganga til liðs við félagið.
Kristján Gauti lék í fyrsta sinn með meistaraflokki FH í sumar en hann lék þrjá leiki í Pepsi-deildinni, þar af einn í byrjunarliði.
Hann hefur auk Liverpool farið til reynslu hjá Gautaborg í Svíþjóð og Rangers í Skotlandi.
Kristján Gauti hefur einnig leikið tvo leiki með U19 ára landsliði Íslands, þrjá með U18 og sjö með U17 ára landsliðinu. Í þessum 12 leikjum skoraði hann sex mörk.
Einn annar íslenskur leikmaður er hjá Liverpool en það er hinn 18 ára gamli Guðlaugur Victor Pálsson sem leikur með varaliði félagsins.
Athugasemdir
