Jóhannes Karl Guðjónsson, miðjumaður Burnley, hefur verið úti í kuldanum síðan að Brian Laws tók við í janúar.

Burnley hefur einungis unnið einn leik af fjórtán undir stjórn Brian Laws og Jóhannes Karl segir að ástandið sé ekki gott.

,,Hann er löngu búinn að tapa klefanum," sagði Jóhannes Karl við Fótbolta.net í gær.

,,Ég held að allir leikmenn séu búnir að missa trú á honum. Gengi liðsins segir sig sjálft og mér sýnist allt stefna niður á við."

Kevin McDonald, miðjumaður Burnley, fór burt frá Turf Moor leikvanginum og á bar eftir að hafa verið skipt út af gegn Manchester City um síðustu helgi og þá hefur verið orðrómur um að Laws hafi lent í rifrildi við Robbie Blake framherja liðsins.

,,Það sýnir sig að menn hafa ekki trú á því sem hann er að gera og þetta virðist ekki ganga upp."