Jóhannes Karl Guðjónsson leikmaður Burnley í ensku úrvalsdeildinni hefur verið settur í tveggja vikna bann af félaginu á meðan rannsókn fer fram á viðtali hans við Fótbolta.net fyrir helgi.

Frá þessu var greint á vef Burnley í dag en þar kemur fram að Jóhannes Karl hafi mætt á agafund hjá félaginu í morgun þar sem þessi ákvörðun var tekin.

Í viðtalinu sem birtist á Fótbolta.net á föstudagsmorgun sagði Jóhannes Karl að Brian Laws knattspyrnustjóri liðsins væri löngu búinn að tapa klefanum og að allir leikmenn væru búnir að missa trú á honum.

Sky Sports tók fréttina svo upp og vitnaði í Fótbolta.net síðar á föstudag og síðan þá hafa flestir fótboltamiðlar á Englandi vitnað í þessa frétt Fótbolta.net og mikið hefur verið rætt um hana.

Laws kom svo í viðtal eftir sigur á Hull á laugardag og sagði að tekið yrði á málum Jóhannesar Karls í dag sem nú er orðin staðreynd.