Gilles Mbang Ondo var hetja Grindvíkinga gegn Haukum í kvöld en hann skoraði tvívegis á tveggja mínútna kafla í síðari hálfleik og tryggði liðinu 3-2 sigur í fallbaráttuslag.
,,Ég er ánægður, við vorum að tapa 2-0 í hálfleik en við sýndum góðan karater og unnum leikinn, það er gott fyrir félagið og alla að vinna tvo leiki í röð" sagði Ondo við Fótbolta.net eftir leik.
,,Í hálfleik talaði þjálfarinn við okkur og sagði okkur að halda áfram. Við vorum líka að tapa gegn Breiðablik í hálfleik en við gáfum allt í þetta og unnum."
Ondo er nú kominn með fimm mörk í deildinni en hvaða markmið hefur hann sett sér?
,,Ég veit það ekki, við sjáum til," svaraði hann.
Grindavík hefur nú unnið tvo leiki í röð, fyrstu leiki liðsins á tímabilinu.
,,Já, eins og ég hef áður sagt þá þurftum við bara einn sigur og þá kemur góður karakter og við byrjum að spila vel. Nú höfum við unnið tvo leiki í röð og vonandi vinnum við næsta leik."