,,Þetta fór að kvissast út í klefanum fyrir leik að Blikarnir væru undir og Þór líka. Það var smá aukaspenna þegar við fórum inn á og vissum að við gátum klárað þetta í dag. Ég bjóst ekki við að þessi laugardagur myndi breytast í að fagna titli en það er bara betra," sagði Hallbera Guðný Gísladóttir leikmaður Vals eftir 8-1 sigur liðsins á Aftureldingu í kvöld en þessi úrslit tryggðu liðinu Íslandsmeistaratitilinn.
Valsstelpurnar voru hæstánægðar með að ná að landa titlinum í dag á laugardegi en ekki sunnudegi eins og oft áður.
,,Það er öðruvísi stemning. Við hittumst allar í kvöld og fáum okkur ekki kaffi og kleinur eins og á sunnudögum. Við fögnum þessu bara vel."
Valur mun núna taka á móti titlinum þegar Grindavík kemur í heimsókn 19.september næstkomandi.
,,Við viljum fá fullt af fólki á völlinn. Þetta er hundraðasti titilinn sem kemur á Hlíðarenda þannig að við viljum fá fólk á völlinn."
Hér að ofan má sjá viðtalið í heild sinni.
