Theódór fagnar með Mist Rúnarsdóttur aðstoðarmanni sínum á dögunum er liðið tryggði sér sæti í Pepsi deildinni.
,,Við ætluðum okkur sigur hérna og ætluðum að klára síðasta markmiðið okkar sem var að vinna dolluna í 1. deild en það hafðist ekki núna," sagði Theódór Sveinjónsson þjálfari kvennaliðs Þróttar við Fótbolta.net eftir 3-1 tap gegn ÍBV í úrslitaleik 1. deildar.
,,Heilt yfir fannst mér við betra liðið og spiluðum fínan bolta en sigurinn datt þeirra megin núna. Það var lítið stress í okkur. Við spiluðum af sjálfstrausti og vissum alveg hvar þær væru sterkar og hverjar ætti að loka á. Við gerðum það mjög vel enda voru þær orðnar mjög pirraðar en svo fer þetta bara svona."
ÍBV komst í 2-1 með marki sem kom uppúr óbeinni aukaspyrnu en áður en boltanum var spyrnt á markið var hann hreyfður lítillega úr stað og Theódór brást reiður við.
,,Hann dæmir óbeina aukaspyrnu úti á velli og það er stigið ofan á boltann. Boltinn fer aldrei heilan hring og það er skotið og skorað. Þetta er mjög leiðinlegt að leikurinn skuli ráðast á svona atriði. Þrátt fyrir að þetta séu góðir dómarar þá gera þeir mistök eins og leikmenn og þjálfarar."
Nánar er rætt við Theódór í sjónvarpinu að ofan.
