Elínborg Ingvarsdóttir miðjumaður ÍBV var komin í sturtu þegar Fótbolti.net falaðist eftir viðtali við hana eftir 2-0 sigur á Fylki í Pepsi-deild kvenna í dag. Þrátt fyrir það var hún klár í viðtal og bauð Fótbolta.net með í sturtu til að taka viðtalið.
„Þetta var virkilega flott hjá okkur, ég er virkilega ánægð með stelpurnar, allar," sagði Elínborg í spjalli við Fótbolta.net í sturtunni en þegar hún var spurð hvað mætti betur fara var hún trufluð í viðtalinu af öðrum leikmönnum í sturtunni sem vildu lánað sjampóið hennar. Hún hélt þó áfram að svara.
„Kannski hefðum við mátt pressa þær aðeins betur og halda víddinni betur. En annars börðumst við bara vel og þetta var flott hjá okkur."
„Við breyttum aðeins til í hálfleik, þéttum á miðjunni og bökkuðum aðeins."
ÍBV mætir Val í næsta leik og um það verkefni sagði Elínborg.
„Já, síðasti leikurinn og við ætlum bara að bæta stigum við og klára þetta bara með stæl. Það er gaman að klára þetta með vinningsleik og taka svo á því um kvöldið."