Eyjamaðurinn Heimir Hallgrímsson hefur verið ráðinn aðstoðarþjálfari Lars Lagerback hjá landsliði Íslands. Frá þessu var greint á blaðamannafundi sem lauk fyrir skömmu í höfuðstöðvum KSÍ.
Heimir hefur náð eftirtektarverðum árangri með ÍBV undanfarin ár en hann lét af störfum sem þjálfari liðsins eftir nýafstaðið tímabil.
Lagerback sagðist á blaðamannafundinum vilja vera eins mikið á landinu og hann geti til að fylgjast með leikmönnum sem spila innanlands. Annars sé hann með Heimi sér við hlið sem sé sérfræðingur í íslenskum fótbolta.
Lagerback mun vera búsettur í Svíþjóð og Heimir í Vestmannaeyjum.