,,Það var eitthvað sem heillaði mig við þetta. Óli (Ólafur Jóhannesson) talaði við mig og spurði hvort ég vildi ekki vinna með sér og mér fannst mjög spennandi. Haukar er líka mjög öflugur klúbbur," sagði Sigurbjörn Hreiðarsson sem samdi í dag við Hauka en hann verður spilandi aðstoðarþjálfari hjá liðinu.
Sigurbjörn, sem verður 36 ára í næsta mánuði, er ekki smeykur við að spila á gervigrasinu hjá Haukum.
,,Ég er í toppmálum segi ég núna. Ég er bara búinn að spila einn gervigrasleik á sumri við Stjörnuna en ég hef engar áhyggjur. Við erum hvort sem er yfir veturinn á þessu gervigrasi og það hefur verið allt í lagi."
Haukar voru lengi vel í baráttu um sæti í Pepsi-deildinni í sumar og á næsta tímabili er stefnan sett upp.
,,Ég held að við getum gert það og við ætlum okkur að vera í þeirri baráttu eins og kannski tíu önnur lið."
Sigurbjörn hefur leikið með Val nánast samfleytt frá árinu 1992 og hann fær að vera áfram í rauðum búning.
,,Þetta er mjög praktískt, ég kem með allt með mér. Ég þarf að skipta um stuttbuxur en annað er það sama," sagði Sigurbjörn hress að lokum.
Hér að ofan má sjá viðtalið í heild sinni.
