Ásmundur Arnarsson þjálfari Fylkis var sáttur með 3-2 sigur sinna manna gegn Val í Reykjavíkurmótinu í kvöld. Fylkismenn lentu undir í tvígang en tókst að jafna metin í 2-2 og skora síðan sigurmarkið rétt fyrir leikslok.
Lestu um leikinn: Valur 2 - 3 Fylkir
Þrátt fyrir sigurinn fannst Ásmundi sínir menn þó gera of mikil mistök en er þó ekki að hafa miklar áhyggjur af því.
,,Heilt yfir er ég sáttur með lokaniðurstöðuna, sáttur með að koma til baka og sáttur með baráttuna, þá hluti allavega," sagði Ásmundur við Fótbolta.net eftir leikinn.
,,Það voru margir feilar hjá okkur í dag en það er kannski bara þessi tími. Það er eitthvað til að vinna í."
Miðvörðurinn Hjörtur Hermannsson skoraði fyrsta mark Fylkis og jafnaði metin í 1-1, en hann hefur vakið áhuga hollenska stórliðsins PSV Eindhoven. Ásmundur segir ekki vitað hvort hann verði áfram leikmaður Fylkis þegar Pepsi deildin hefst í sumar.
,,Hann er öflugur, það er klárt. Það verður bara að koma í ljós hvort hann verður með okkur í sumar, við vitum það ekki eins og er. Hann er Fylkismaður í dag og annað verður bara að koma í ljós."
