Kristján Guðmundsson þjálfari Vals var sáttur með spilamennsku sinna manna þrátt fyrir 3-2 tap gegn Fylki í Reykjavíkurmótinu í kvöld.
Lestu um leikinn: Valur 2 - 3 Fylkir
,,Við vorum mun betri en í fyrsta leiknum á móti Þrótti, langt um betri. Við eigum 14 skot að markinu, sem er svipað og í síðasta leik. Munurinn er að við náðum núna að skora tvö, en við náðum ekki alveg að klára þá og komast tveimur mörkum yfir," sagði Kristján við Fótbolta.net.
Aðalmarkvörðurinn Haraldur Björnsson gekk í vikunni til liðs við Sarpsborg í Noregi og eftir standa þeir Ásgeir Þór Magnússon og Sindri Snær Jensson. Kristján segist ekki ætla að fá nýjan markmann í búrið, heldur muni þessir tveir berjast um stöðu aðalmarkvarðar.
,,Við notum Ásgeir og Sindra í sumar, það er alveg ákveðið. Nú verða þeir bara að berjast um stöðuna. Það er ekki gefið í dag hvor þeirra verður númer eitt, þeir fá að berjast um stöðuna og sýna sig á æfingum og í leikjum."
Einkennileg sjón blasti við áhorfendum í Egilshöll í kvöld, en í hálfleik röðuðu þjálfararnir upp keilum og gerðu leikmenn síðan upphitunaræfingar áður en þeir fóru inn á völlinn á nýjan leik. Kristján segist ætla að beita þessari tækni í sumar til að koma blóði leikmanna á hreyfingu.
,,Það var hugsunin að gera þetta í fyrra en okkur fannst það of mikið miðað við það sem við vorum að gera. En nú ætlum við að gera þetta alltaf, vera ekki of lengi inni í klefanum og vera betur tilbúnir í að byrja seinni hálfleikinn með því að hita upp í þeim hreyfingum sem eru í fótboltanum. Þetta er bara svo að leikmenn séu ekki að mæta í seinni hálfleikinn nýstaðnir upp af bekknum inni í klefa," sagði Kristján að lokum við Fótbolta.net.
