Phil Dowd mun fá það verkefni að dæma leik Manchester United og Liverpool á Old Trafford á laugardag.
Búast má við að stemningin verði rafmögnuð á Old Trafford á laugardag en Luis Suarez mun mæta Patrice Evra á nýjan leik eftir að hafa verið dæmdur fyrir kynþáttafordóma í garð Frakkans í leik liðanna á Anfield í október síðastliðnum.
Síðast þegar Manchester United og Liverpool áttust við á Old Trafford fyrir rúmu ári síðan sigruðu heimamenn 1-0 en sigurmarkið kom úr umdeildri vítaspyrnu.
Eftir leikinn birti Ryan Babel, þáverandi leikmaður Liverpool, mynd á Twitter síðu sinni af Howard Webb dómara leiksins þar sem búið var að breyta myndinni þannig að hann væri í treyju Manchester United.
Babel var síðan sektaður í kjölfarið af enska knattspyrnusambandinu áður en hann var seldur til Hoffenheim nokkrum vikum síðar.
