Harry Redknapp, stjóri Tottenham á Englandi getur ekki stýrt liðinu í kvöld gegn Liverpool í ensku úrvalsdeildinni.
Flugið var fellt niður hjá enska stjóranum sem hefur verið að sinna persónulegum erindum undanfarna daga. Hann mætti í réttarsal í dag, en hann hefur verið kærður fyrir skattsvik á meðan hann starfaði fyrir Portsmouth.
Hann er sakaður um að hafa þegið greiðslur frá eiganda Portsmouth án þess að tilkynna greiðslurnar til skatts, en hundurinn hans Harry fékk greiðslurnar á sitt nafn og hefur því stjórinn verið ansi upptekinn að undanförnu.
Hann getur því ekki stýrt Tottenham í kvöld gegn Liverpool, en leikurinn er háður á Anfield Road heimavelli Liverpool. Það er þó óvíst hvort hann komi til með að fara fram en mikil þoka er á vellinum þessa stundina.
