Hjálmar Jónsson.
Varnarmaðurinnn Hjálmar Jónsson er að hefja sitt ellefta tímabil með IFK Gautaborg en hann kann afar vel við sig hjá félaginu.
,,Mér hefur alltaf liðið vel hérna. Síðast þegar ég samdi vorum við með gott lið sem mér fannst geta náð lengra en því miður hafa síðustu tvö tímabil verið döpur hjá okkur," sagði Hjálmar þegar Fótbolti.net ræddi við hann í síðustu viku en Gautaborg var þá í æfingaferð á Benidorm á Spáni.
,,Þeir segja að ég sé orðinn mesti Svíinn í liðinu en ég held í íslensku böndin og er búinn að vera með Íslendinga sem samherja síðan Raggi kom árið 2007. Ég er ennþá Íslendingur."
Hjálmar lék lengi sem vinstri bakvörður hjá Gautaborg en nú er hann kominn í hjarta varnarinnar hjá liðinu.
,,Þetta er ný staða og mér líkar vel við hana. Hún passar þegar ég verð kominn á efri ár og ég hef hug á að spila þessa stöðu áfram."
Hjálmar á 18 leiki að baki með A-landsliði Íslands en síðasti landsleikur hans var árið 2008.
,,Ég hef greinilega ekki verið nógu góður en ég vona að ég fái tækifæri aftur," sagði Hjálmar sem var í fyrsta æfingahóp Lars Lagerback í síðasta mánuði.
,,Ég hef fylgst með honum í gegnum tíðina. Hann er búinn að vera landsliðsþjálfari hérna síðan ég kom út og ég veit hvernig hann vill að formið á liðinu sé. Mér leist mjög vel á hugmyndirnar sem hann bar fram."
Hjálmar er uppalinn hjá Hetti á Egilsstöðum og var hæstánægður þegar liðið komst upp í fyrstu deild síðastliðið haust. Er möguleiki á að hann endi ferilinn á heimaslóðum?
,,Ég ætla að láta það ósagt en maður veit aldrei í fótboltanum. Það væri mjög gaman en ég get ekki lofað því. Ég á þetta tímabil eftir hérna úti og síðan verður að koma í ljós hvað verður."
Hér að ofan má sjá viðtalið í heild sinni
