„Vonandi fer þessum neikvæða kafla að ljúka," segir Javier Zanetti, fyrirliði Inter. Ítalska liðinu hefur gengið mjög illa í síðustu leikjum og tapaði í kvöld 1-0 fyrir Marseille í fyrri leik liðanna í 16-liða úrslitum Meistaradeildarinnar.
„Við erum mjög sárir og pirraðir yfir því hvernig ástandið er. Ég tel að við höfum spilað með karakter í kvöld en fengum á okkur mark með síðustu snertingu leiksins. Svona er fótboltinn. Við verðum bara að byrja upp á nýtt."
„Óheppni? Það var smá af öllu sem spilaði saman. Við áttum ekki skilið að tapa í kvöld en þetta var hluti af þessum neikvæða kafla sem við erum að ganga í gegnum."
Pressan eykst á Claudio Ranieri, þjálfara Inter.
