Breiðablik varð í kvöld fyrsta liðið til að tryggja sér sæti í undanúrslitum Lengjubikarsins þegar liðið sigraði Keflavík 2-1 í framlengdum leik í Reykjaneshöllinni.

Árni Vilhjálmsson kom Blikum yfir þegar korter var eftir en Guðmundur Steinarsson jafnaði fimm mínútum síðar.

Snemma í framlengingunni fékk Ómar Jóhannsson markvörður Keflvíkinga að líta rauða spjaldið fyrir að brjóta á Elfari Árna Aðalsteinssyni framherja Blika.

Haukur Baldvinsson skoraði síðan sigurmarkið með skoti sem fór í varnarmann og þaðan í netið framhjá Árna Frey Ásgeirssyni sem var kominn í markið.

Breiðablik mun mæta FH eða KR í undaúrslitunum næstkomandi mánudagskvöld.