Tveir Íslendingar voru á ferðinni í síðustu tveim leikjum kvöldsins í efstu deild í Noregi, en annar þeirra lagði upp mark í stórsigri.
Birkir Már Sævarsson lék allan leikinn og lagði upp mark í 5-0 sigri Brann á Sogndal í kvöld, en hann lagði upp fyrsta mark leiksins á nígeríska framherjann Bentley sem hefur verið heitur á tímabilinu. Brann er því í tólfta sæti með tíu stig eftir níu umferðir.
Steinþór Freyr Þorsteinsson lék þá allan leikinn í liði Sandnes Ulf sem gerði 2-2 jafntefli við Odd Grenland. Steinþór var líflegur í fyrri hálfleiknum og lagði upp nokkur góð færi ásamt því að hann átti nokkur færi á markið, en sást svo lítið í þeim síðari.
Sandnes Ulf situr í sjöunda sæti deildarinnar með 13 stig, sem verður að teljast fínn árangur til þessa fyrir lið sem er ný komið upp um deild.
