Napoli sigraði í kvöld Juventus í úrslitum ítalska bikarins, 2-0.
Edinson Cavani skoraði fyrsta mark leiksins þegar tæpur hálftími var eftir af leiknum. Markið kom úr vítaspyrnu sem dæmd hafði verið eftir að brotið var á Ezequiel Lavezzi innan teigs.
Það var síðan Slóvakinn Marek Hamsik sem tryggði sigurinn með marki úr skyndisókn seint í leiknum.
Flestir höfðu búist við sigri Juventus sem á dögunum urðu meistarar. Annað kom hinsvegar á daginn þar sem Juventus tapaði þarna sínum fyrsta leik í 43 leikjum í öllum keppnum.
Þetta var einnig síðasti leikur goðsagnarinnar Alessandro Del Piero fyrir Juventus eftir 19 ára vist.
