Heimild: Daily Mail
Verðmiði Björns Bergmanns Sigurðarsonar fer hækkandi dag frá degi ef marka má enska fjölmiðla.
Í gær greindi Daily Mirror frá áhuga Úlfanna á leikmanninum þar sem nýráðinn stjóri liðsins, Stale Solbakken, var sagður reiðbúinn að borga Lilleström þrjár milljónir punda fyrir leikmanninn.
Á vefsíðu Daily Mail er hins vegar fullyrt nú í morgunsárið að David Moyes, stjóri Everton, líti hýru auga til Björns og ku tilboð upp á fjórar milljónir punda vera á leið inn á borð til forráðamanna Lilleström.
Útsendari frá Everton fylgdist með Birni skora eina mark leiksins þegar Lilleström sigraði Sognal, 1-0, í norsku úrvalsdeildinni í gær en útsendarar víðsvegar að úr Evrópu hafa flykkst á leiki Lilleström að undanförnu í þeim tilgangi að skoða Björn, enda hefur hann verið sjóðheitur upp við mark andstæðinganna síðustu vikurnar.
Hann hefur skorað sjö mörk í síðustu fjórum deildarleikjum liðsins og samtals 11 mörk í síðustu sex leikjum liðsins í deild og bikar.
