Bjarni Jóhannsson.
,,Ég er mjög sáttur, sérstaklega við seinni hálfleikinn," sagði Bjarni Jóhannsson þjálfari Stjörnunnar eftir 1-4 sigur á Grindavík í kvöld en heimamenn höfðu komist yfir eftir 27 sekúndur.
Lestu um leikinn: Grindavík 1 - 4 Stjarnan
,,Við lentum undir strax og það var ekkert sérstakt, en sem betur fer náðum við að jafna fljótlega eftir markið. Svo var leikurinn í járnum í fyrri hálfleik en svo fannst mér við ná mjög góðum tökum á leiknum í seinni hálfleik og við spiluðum hann mjög vel."
,,Ég held að þeir hafi fengið eitt færi í seinni hálfleik svo í heildina var ég ánægður með leik liðsins. Eins og ég hef oft sagt áður þá er maí mánuður að koma traktornum almennilega í gang og hérna voru skemmtilegir taktar fram á við þegar leið á leikinn."
,,Danirnir sem við höfum fengið bæði í fyrra núna eru mjög góðir fótboltamenn og eru að hjálpa okkur mikið. Þeir lífga enn frekar upp á sóknarleik okkar sem hefur verið sprækur síðustu ár."
,,Alexander er búinn að vera hérna langlengst, og Mads er bara ný kominn. Það tekur alltaf tíma fyrir þessa stráka að venjast tempóinu. Mads sagði við mig um daginn 'Við tökum alltaf lengri spretti hérna á Íslandi en í Danmörku."
,,Þetta var ágætis völlur fyrir mig að vinna 100. leikinn, hér á ég fínar minningar síðan ég var að þjálfa Grindavík, þó svo allir séu ánægðir með mig núna, en örugglega einhverjir."
