Jóhannes Karl Guðjónsson
,,Við vissum náttúrulega að þeir myndu koma út alveg grenjandi vitlausir og náttúrulega ekki búið að ganga sem skildi hjá þeim," sagði Jóhannes Karl Guðjónsson, fyrirliði ÍA eftir 2-2 jafntefli liðsins gegn Grindvíkingum í dag.
ÍA rétt náði stigi gegn Grindvíkingum í dag. Tomi Ameobi kom heimamönnum yfir og þá jafnaði Jón Vilhelm Ákason metin rétt fyrir lok fyrri hálfleiks. Pape Mamadou Faye kom inn á sem varamaður og kom heimamönnum yfir á nýjan leik áður en Mark Doninger bjargaði stigi fyrir ÍA undir lok leiks.
,,Við vissum að þetta yrði hörkuleikur í dag sem þetta var. Kannski ekki besti fótboltinn, mikið um rok og langar sendingar, en Grindvíkingarnir koma okkur ekkert á óvart. Við svona vissum hvað þeir myndu reyna að gera og þeir eru náttúrulega með sterkan mann þarna frammi, Ameobi sem gerir þarna vel í markinu."
,,Við hefðum getað komið í veg fyrir þetta, svolítill klaufagangur í okkur. Þeir settu mikla pressu á okkur í fyrri hálfleik og sama var hjá okkur þegar vindurinn var með okkur þar sem við pressuðum á þá í síðari. Eina færið sem þeir fá í síðari hálfleik er þetta mark sem þeir skora, sem hefði átt að vera auðvelt fyrir okkur að verjast."
,,Við höfðum trú á því sem við vorum að gera og við vitum að við sköpum okkur færi. Gary fékk hérna frábært færi hérna rétt fyrir framan, tvo metra frá markinu og náði ekki að setja hann þá. Doninger fékk frábært færi og svo bjargað frá línu. Svona í seinni hálfleik hefðum kannski átt skilið að fara með öll þrjú stigin, en ef litið er á heildina á leiknum þá var jafntefli kannski ekkert ósanngjörn úrslit."
,,Ég veit ekki hvernig á að svara því. Við náttúrulega reynum að berjast eins mikið og við getum. Þetta féll svolítið með þeim í fyrri hálfleik, en við áttum samt góðar rispur þar sem við spiluðum okkur vel upp kantanna og með góðar fyrirgjafir. Það vantaði kannski aðeins upp á lokasendinguna og kannski að klára að setja boltann á markið, en eins og ég segi áðan, ef litið er á heildina á leiknum þá er jafntefli kannski ágætis úrslit fyrir bæði lið," sagði hann að lokum.
Hægt er að sjá viðtalið í heild sinni hér að ofan í sjónvarpinu.
