Magnús Gylfason þjálfari Eyjamanna var himinlifandi með 3-2 sigur ÍBV á Fram á Hásteinsvellinum í dag. Eyjamenn hafa nú unnið fimm leiki í röð í deildinni, eftir erfiða byrjun.
,,Við komumst tvisvar sinnum í tveggja marka forystu og undir venjulegum kringumstæðum hefði það átt að vera allt í lagi en við gáfum það eftir og við erum svolítið gjarnir á það að missa einbeitinguna þegar við skorum mark eins og í Evrópuleiknum þegar við skorum þá fáum við á okkur mark strax í bakið, tvisvar sinnum hérna í dag og þetta er eitthvað sem við þurfum virkilega að skoða," sagði Magnús sem segir að sínir menn séu orðnir virkilega þreyttir og því kærkomið frí sem ÍBV liðið fær núna, í viku.
,,Menn hafa afsökun í dag og ég fyrirgef þeim það fyrst við unnum leikinn en ég var orðinn ansi stressaður að missa niður tvisvar sinnum forskot. Það er komið rosaleg þreyta í mannskapinn," sagði Maggi sem viðurkennir að ÍBV-liðið hafi verið heppið á köflum og einfaldlega að hafa náð að landa þessum þremur stigum,
,,... við vorum heppnir að fá þessi þrjú stig í dag, Framararnir hefðum hæglega getað verið búnir að jafna áður en við komumst í 2-0, þeir hefðu hæglega getað verið búnir að jafna í stöðunni 3-2 en þetta tókst í dag og ég fagna þessum stigum, engu öðru," sagði hinn geðþekki, Magnús Gylfason þjálfari Eyjamanna sem sitja í 4.sæti deildarinnar eftir sigurinn í dag.
Viðtalið í heild sinni er hægt að sjá í sjónvarpinu hér að ofan.
