Heimir Guðjónsson var jakkafataklæddur í fyrri leiknum gegn AIK og endurtekur leikinn á Kaplakrikavelli í kvöld þegar seinni leikurinn fer fram. Staðan í einvíginu er 1-1.
„Þetta er Evrópuleikur og þá verður að tjalda öllu. Maður gæti jafnvel tekið fram saltfiskinn á morgun, það er aldrei að vita," sagði Heimir við Fótbolta.net á blaðamannafundi í gær.
„Ég held að við eigum ágætis möguleika Þó við höfum náð góðum úrslitum úti eru þeir líklegri að fara áfram. Við þurfum að spila virkilega góðan leik til að eiga möguleika,"
„Við þurfum að geta haldið boltanum innan liðsins og sótt á þá. Það þýðir ekki að spila bara varnarleik og vona það besta. Við þurfum að ná að herja á þá. Þeir eru mjög öflugt lið og með marga góða sóknarmenn."
Bjarki Gunnlaugsson hefur spilað tvo 90 mínútna leiki á viku og þessi 39 ára gamli leikmaður er klár í slaginn í kvöld. Hann var einn allra besti leikmaðurinn í fyrri leiknum en athygli vakti að hann var ekki hvíldur í deildarleik gegn Grindavík síðasta sunnudag.
„Honum leið vel eftir leikinn í Svíþjóð og vildi endilega spila. Hann er liðinu gríðarlega mikilvægur," sagði Heimir.
Leikurinn í kvöld hefst klukkan 19:15 á Kaplakrikavelli.
