Gunnlaugur Jónsson.
Gunnlaugur Jónsson er hættur sem þjálfari KA en þessu greindi hann frá á lokahófi félagsins í kvöld. Gunnlaugur hefur þjálfað KA undanfarin tvö ár en liðið endaði í 4. sæti í fyrstu deildinni í sumar undir hans stjórn.
,,Þetta er sameiginleg ákvörðun mín og félagsins. Helsta ástæðan er persónuleg hjá mér, fjölskyldulega er erfitt fyrir mig að vera þriðja árið og því er óumflýjanlegt að ég get ekki verið hér áfram. Ég er með níu mánaða gamla stelpu og strák sem er að byrja skóla í Reykjavík og aðstæður eru þannig að ég get ekki flutt á Akureyri," sagði Gunnlaugur við Fótbolta.net.
,,Samstarfið hefur verið gott við stjórn félagsins. Þrátt fyrir að við höfum ekki náð að komast upp þá get ég verið sáttur við árangur liðsins, að enda í 4. sæti á markatölu. Slæm byrjun og árangur okkar gegn botnliðunum varð okkur kannski að falli. Liðið er mjög gott og það hefur verið stígandi frá því að ég byrjaði. Ég er sáttur við þennan tíma og hvernig liðið er statt núna."
Gunnlaugur þjálfaði bæði Selfoss og Val áður en hann tók við KA og hann stefnir á að halda áfram í þjálfun.
,,Ég stefni á það. Ég hef ekkert heyrt frá neinum félögum en við sjáum hvernig stokkast í kapalinn. Það eina sem er ákveðið er að ég verð ekki hér áfram. Við verðum að sjá hvað gerist hjá öðrum liðum og hvort eitthvað spennandi komi upp," sagði Gunnlaugur.
