Manchester City getur þakkað markverðinum Joe Hart fyrir stigið sem liðið fékk í Meistaradeildinni í kvöld. City gerði 1-1 jafntefli gegn Borussia Dortmund þar sem Hart varði meistaralega trekk í trekk.
„Joe Hart hefur verið ótrúlegur. Að mínu mati besti markvörður heims," skrifaði Wayne Rooney, sóknarmaður Manchester United, á Twitter. Hart og Rooney eru liðsfélagar hjá enska landsliðinu
Hart viðurkenndi fúslega eftir leikinn að þýska liðið hefði verið mikið betra.
„Við verðum að vera ánægðir með stigið. Borussia Dortmund var í sérflokki og það þurfti öfluga varnarvinnu til að halda þeim bara í einu marki," sagði Hart.
City er aðeins með eitt stig eftir fyrstu tvær umferðirnar en hefði liðið tapað í kvöld hefði vonin um að komast upp úr riðlinum orðið ansi veik.
