Magnús Már Einarsson skrifar frá Albaníu
,,Þetta er ein af bestu tilfinningum sem ég hef upplifað á fótboltavelli. Þetta var algörlega stórkostlegt," sagði landsliðsmarkvörðurinn Hannes Þór Halldórsson ánægður eftir 2-1 sigurinn á Albaníu í rigninguni í kvöld.
,,Það eru ekki kjöraðstæður að allt sé rennandi blautt inni á vellinum, það gerir starf markvarðarins aðeins erfiðara. Það setur mann í öðruvísi stellingar, maður er undirbúinn að halda ekki öllu, gírar sig upp í það og vonar að hlutirnir falli með manni eins og í dag. Þetta var frábær sigur liðsheildarinnar og frábær frammistaða hjá öllu liðinu."
Hannes átti stórbrotna markvörslu í síðari hálfleik þegar hann varði skot Armando Sadiku út við stöng. Hannes hélt að skotið væri á leiðinni inn.
,,Ég hélt það á leiðinni. Það eru skemmtilegustu markvörslurnar þegar maður kemur sjálfum sér á óvart og nær að krafsa í hann þegar hann er á leiðinni inn."
Hér að ofan má sjá viðtalið í heild sinni.
