Lagaerback á hliðarlínunni í kvöld.
Lars Lagerback landsliðsþjálfari Íslands ræddi við fréttamenn eftir 0 - 2 tapið gegn Sviss í undankeppni HM 2012 í kvöld. Fréttamannafundinn má sjá í heild sinni hér að ofan en hér að neðan verður bætt við meira af skrifuðu efni af fundinum.
,,Ef við erum að tala um skalann 1-10 þá er það 10," sagði Lars Lagerback landsliðsþjálfari Íslands við fréttamenn eftir 0 - 2 tap gegn Sviss í kvöld aðspurður hversu vonsvikinn hann var með tapið.
,,Það er hægt að sætta sig við tap ef hitt liðið er miklu betra. Við vorum svolitið passívir í fyrri hálfleik en í síðari hálfleiknum fórum við meira fram en við vörðumst og úr því fengum við líka betri sóknir. Miðað við marktækifærin sem við fengum í seinni hálfleik fannst mér við verðskulda jafntefli."
,,Ég get bara hrósað leikmönnunum en við töpuðum og það eru mörkin sem telja. Við fengum á okkur mörk en skoruðum ekki úr marktækifærunum okkar. Við fengu þrjú opin færi í seinni hálfleik og nokkrar góðar hraðsóknir og aukaspyrnu Gylfa í fyrri svo við hefðum getað skorað í fyrri."
,,Hannes þurfti ekki að verja í fyrri hálfleik þó svo þeir hafi verið betri en við. Ég er mjög vonsvikinn en við sögðum í búningsklefanum að við erum með sex stig svo við eigum enn möguleika. Noregur er með sjö því þeir unnu í kvöld. Sviss er aðeins að stinga af en það er enn nóg eftir. Það eru leikmenn sem koma inn í næstu leikjum eins og Kolbeinn svo ég býst við að við verðum betri á næsta ári."
Rúrik Gíslason, Grétar Rafn Steinsson og Kári Árnason fengu allir sitt annað gula spjald í unankeppninni og verða því í leikbanni í næsta leik gegn Slóveníu.
,,Það er það eina neikvæða sem við höfum lent í. Í Albaníu voru þetta óþörf gul spjöld. Það má alltaf ræða einhver af þessum spjöldum en svona er þetta bara. Spjöldin í dag voru ekki óþörf, af því sem ég sá var ekkert þeirra alveg rangt, kannski eitt en það er bara svona."
