,,Þetta er mjög pirrandi, við áttum meira skilið en þetta, alla vega eitt stig," sagði Birkir Bjarnason, leikmaður Pescara og íslenska landsliðsins í dag.
Ísland tapaði fyrir Sviss með tveimur mörkum gegn engu. Tranquillo Barnetta kom Sviss yfir áður en Mario Gavranovic bætti við.
,,Þeir voru fínir en mér fannst við mjög góðir í alla vega sextíu eða sjötíu mínútur. Þetta datt svolítið niður eftir þetta mark."
,,Mér leið bara mjög vel og mér fannst við spila mjög vel allt liðið. Spiluðum mjög vel saman og vorum að sýna það í dag."
,,Maður var svolítið lágur þarna á köflum, en maður verður stundum að gera það þegar maður mætir góðum liðum. Það er mjög pirrandi að boltinn fór ekki inn, en svona er þetta."
,,Eins og leikurinn þróaðist í dag þá áttum við meira skilið. Þó að það er leiðinlegt að enda þetta með tapi þá eru það fimm mánuðir sem við höfum til að undirbúa okkur," sagði Birkir að lokum.
Hægt er að sjá viðtalið í heild sinni hér að ofan.
