Eins og Fótbolti.net greindi frá í gær voru talsverð læti í Serbíu þegar U21 árs landsliðið tapaði fyrir enska U21 árs landsliðinu í umspili um sæti á EM á næsta ári. Danny Rose fékk þá sitt annað gula spjald (og þar með rautt) að leik loknum fyrir að missa stjórn á skapi sínu en hann gaf í skyn að stuðningsmenn Serba hefðu verið að gera apahljóð. Það var þó ekki staðfest fyrr en nú, en myndband úr stúkunni er á netinu þar sem gríðarlega hávær apahljóð heyrast frá stuðningsmönnum Serba. Ekkert nema skammarlegt og vonandi mun UEFA sambandið bregðast harkalega við þessu.
