Slúðurpakkinn hefur oft verið þykkari enda eru landsleikir í fullum gangi. BBC tók molana saman.
Roberto Mancini horfir til Sergio Busquets, miðjumanns Barcelona, varðandi styrkingu á liði Manchester City. Busquets hefur verið ansi sigursæll með Börsungum en hann lék á sínum tíma með Yaya Toure. (Daily Mirror)
Brasilíumaðurinn Neymar þykir hafa gefið ákveðnar vísbendingar með því að segjast vilja læra ensku. (TalkSport)
AC Milan vill fá portúgalska vængmanninn Nani frá Manchester United. Nani gæti verið falur fyrir 12 milljónir punda. (Metro)
Brendan Rodgers, stjóri Liverpool, er ekki tilbúinn að borga 20 milljónir punda fyrir sóknarmanninn Daniel Sturridge hjá Chelsea. Hann hefur þó áhuga á að fá Sturridge lánaðan til að byrja með. (Daily Mirror)
Chelsea íhugar að gera aðra tilraun til að fá sóknarmanninn Loic Remy frá Marseille í janúar. Hann á þá að fylla skarðið sem Sturridge gæti skilið eftir sig. (London Evening Standard)
Fernando Torres hefur opinberað vonleysið sem var í herbúðum Chelsea um tíma á síðasta tímabili. Hann segir sig sjálfan og fleiri hafa hætt að taka það inn á sig þó leikir hafi tapast. (El Pais)
Joey Barton, sem er að afplána 12 leikja bann, lenti í handalögmálum í æfingaleik með Marseille. Barton er á lánssamningi hjá félaginu frá QPR. (Daily Mail)
Leikmenn skoska liðsins Hearts þurfa að bíða lengur eftir launagreiðslum sínum en félagið á í miklum fjárhagserfiðleikum. (Daily Express)
