Knattspyrnusamband Evrópu, UEFA, hefur ákært knattspyrnusambönd Serbíu og Englands eftir atvikið við lok leiks U-21 landsliða landanna í gærkvöldi í Serbíu.
Serbneska knattspyrnusambandið hefur verið ákært fyrir kynþáttaníðssöngva stuðningsmanna sem létu frá sér apahljóð allan leikinn, auk þess sem sambandið er ákært fyrir hegðun leikmanna leiksins, en ljót slagsmál brutust út eftir lokflaut.
UEFA hefur einnig ákveðið að ákæra enska knattspyrnusambandið vegna ósæmilegrar hegðunar leikmanna Englands í lok leiks og eftir hann.
Málið verður tekið fyrir seinni part nóvembermánaðar.
Serbar hafa þegar hafnað öllum ásökunum um að kynþáttahatur hafi átt sér stað á leiknum þrátt fyrir ásaknir þeirra ensku um að það hafi verið viðgangandi allan leikinn.
