Clarence Seedorf fyrrum miðjumaður AC Milan er nú orðaður við þjálfarastöðu félagsins. Reiknað er með því að Massimiliano Allegri verði leystur undan samningi í þessari viku og muni í kjölfarið taka við stjórnartaumunum hjá Roma.
Sport Mediaset segir að Silvio Berlusconi hyggist gefa hinum 37 ára Seedorf tækifæri í þjálfarastólnum en hann hætti sem leikmaður Milan fyrir einu ári og gekk í raðir Botafogo í Brasilíu en hann spilaði fyrir Milan í tíu ár.
Tveir aðrir fyrrum leikmenn liðsins hafa einnig verið orðaðir við þjálfarastöðuna; Filippo Inzaghi og Marco Van Basten.
Seedorf gaf það nýlega út að hann stefnir á að fara í þjálfun í framtíðinni.
Allegri hefur verið þjálfari AC Milan síðustu þrjú ár. Hann stýrði liðinu til meistaratitils á fyrsta ári, svo í annað sætið og í ár hafnaði það í þriðja sæti.
