Jörundur Áki Sveinsson.
Útvarpsþátturinn Fótbolti.net hefur verið að taka púlsinn á þjálfurum 1. deildarinnar að undanförnu. Í spilaranum hér að ofan má heyra hvað Jörundur Áki Sveinsson, þjálfari BÍ/Bolungarvíkur, hafði að segja í þættinum á laugardag.
„Þetta er púsluspil hjá okkur. Við erum með 6-8 menn í bænum og svipað fyrir vestan. Hópurinn hefur verið tvískiptur og við ekki æft saman síðan í september. Veðrið hefur sett strik í reikninginn en við reynum bara að gera sem best úr þessu," segir Jörundur.
„Það eru miklar breytingar á liðinu frá því í fyrra og það munar um það. Við þurfum bara að púsla þessu saman fyrir sumarið. Við þurfum að stilla strengina. Það er óhemju útgerð fyrir okkur að halda saman fótboltaliði sem er á tveimur stöðum. Þetta kostar allt sitt og við þurfum að vega og meta hvernig framhaldið verður varðandi að bæta við sig mannskap."
„Það eru nokkrir ungir og efnilegir að koma upp fyrir vestan og við horfum til þeirra. Það er kannski aðeins lengra í þá en að þeir spili mjög stórt hlutverk í sumar en engu að síður eigum við þarna mjög flotta unga leikmenn sem hafa verið að fá spiltíma núna og það er frábært að þeir fái smá reynslu. Innan tveggja til þriggja ára verða þeir vonandi farnir að spila stórt hlutverk."
„Það vilja allir vera í þessari baráttu í efri hlutanum og við vorum í henni í fyrra. Við lentum í smá leiðindakafla þar sem við misstum aðeins dampinn en náðum að vinna okkur aftur í toppbaráttuna. Það verður að koma í ljós hversu vel mun ganga í sumar."
„Við höfum skoðað ansi marga leikmenn í vetur en sjáum hvað gerist. Það eru einn til tveir í sigtinu hjá okkur núna. Þetta kemur bara í ljós á næstu dögum eða vikum hvort þetta gangi upp," segir Jörundur en hægt er að hlusta á viðtalið í heild sinni í spilaranum hér að ofan.
Athugasemdir
