„Undirbúningstímabilið var ágætt en klúbburinn er í smá fjárhagserfiðleikum og það hefur verið smá vesen. Þrátt fyrir það hefur liðið verið vel þjappað saman. Liðið hefur átt fína leiki og æft vel," sagði Pálmi.

„Við fengum eitt stig í fyrstu umferð á erfiðum útivelli. Við erum samt svolítið upp og niður. Það verður að segjast eins og er. Við erum þokkalega þunnskipaðir en gæðin eru fín. Við höfum verið með nokkurnveginn sama hóp síðustu tvö til þrjú ár sem er nokkuð gott."

Pálmi hefur verið í Noregi síðan 2008, fyrst með Stabæk en fór til Lilleström 2012.

„Mér og fjölskyldunni líður mjög vel hérna og það er yfir litlu að kvarta. Það hefur verið inni í dæminu að prófa eitthvað annað en Lilleström sýndi áhuga þegar samningur minn við Stabæk rann út."

Það eru fjölmargir Íslendingar í norska boltanum eins og oft áður.

„Norðmennirnir eru hættir að vera hissa á því hvað við Íslendingar framleiðum mikið af fótboltamönnum. Það koma margir góðir leikmenn frá Íslandi og þetta er bara orðið venjulegt fyrir þeim," sagði Pálmi.

Hægt er að hlusta á viðtalið í heild sinni í spilaranum hér að ofan en hann segir að Molde sé líklegasta liðið til að vinna norsku deildina.